In‘n 2. Jahrhunnert v. Ch. harre man in den ooln Rom tau veel Sklaven uut andere Länder ran ehalt. Se mossten so billich arbein wie de Römer sülwest dat nich konn‘n. Se harrn ja ne Familich, dee leben wolle. Dadorch sünd de Buurn un de einfachen Lüü nich defreen ewest un wollten op de Barrikaden gahn. De Kaiser wolle se stille holn un wiese an, dat se dunne Korn forr Brot krejjen von‘n Staate, ohne Jeld de betahln. Se sallten ook nich naadenken. Darumme laate man se in den Circus rin ohne Jeld. Se krejjen "Panem et circenses", dat meint sau veel wie: "Brot un Speele."

An düssen Spruch mosste ick jetzt öfter mal denken, nämlich ümmer denn, wenn wedder en Fautballspeeler uut en frem‘n Lanne forr Millionen inekofft ward. Unse Minschen hier sünd satt un willt ook noch schöne Speele ankucken. Darumme werd so en Minsch taxiert, man feilscht hen un her, wie dunnemals op en Sklavenmarchte. Ick fraa mick, wie sick düsse Minsch feuhlt. Is hei stolt, dat en Verein sau veel forr ne betahlt? Hei sülwest verdeint ja ook allerhand un süht wat von de Welt. (Dat is anders wie bie de Sklaven in Rom.) Man sett ne an den Platz von en Speeler, dee nich nauch Amüsement ebrocht hat forr Lüü, dee an nist anderes denken könnt wie an den Spaß op de Tribüne bien Fautballkucken. Sülwest speeln willt se nich, awer gröln. Mit‘n Muule alles better wetten, dat maket se Spaß! Löppet einder von "unse Jungens" op‘n Platze nich schwinne nauch oder bringet den Ball nich in‘t Door, denn werd efleutchet.

Deu man bie de Speele mal raupen: "Alle Uutländer uut düsse Manschaft ruuttreen!" Wer bleiw denn op‘n Platze von "unse Jungens?" Desamme Sport driewen mit Lüü uut alle Länder un sick dabie einich sien un alle "integrieren" is ganz wat anderes wie in‘n Uutlanne Minschen forr Millionen Euro inköpen taun Fautballspeeln in unse Mannschaften!! Dütsche na Engeland verköpen un Italien, Tschechen na Dütschland - un dat, weil sau veele Minschen satt sünd, also Brot nauch het, un nu noch schöne Speele hem‘n willt?

Wer keine Freude an Fautball hat, forr dene hat RTL desammeschnedden, wat dit Jahr in‘n Dschungelcamp schlecht war. Schlechte Naarichten sünd nämlich forr de Presse gue Naarichten! Jejen de Römer is dat gar nist. Dee laaten de Sklaven mit wille Diere kämpfen. Dat wollten de Lüü sick ankucken. RTL hat wat von düsse römischen Kaisers elehrt. Dee sejjen dunnemals: "Wer dit gruselije Speel ankucket, werd nich opstinatsch jejen dat, wat ne alle Daa wedder arjert."

So einfach kann dat sien? Bestimmt nich forr alle Minschen. Veele Lüü laat sick nist tausteeken - ob nu Brot oder Speele oder Jeld. Se willt gradeuut gahn un alle Lüü in de Oon kucken könn‘n. Se nehmt de Arbeit oder dat Amt ernst un daut dat, wat edaan werd‘n mot, ook wenn dat nich ümmer ne Freude is un kein Jeld bringet forr se. Ümmer mehr Lüü sett sick in forr andere un hilpet, wo‘t nödich is. Se öwwernehmt sick en Ehrenamt. Härrn unse Füerwehrlüü nich sau ofte ne Übung anesett, härrn se nich sau schwinne hilpen könn‘n, wie‘t mal nödich war. Training forr‘t Hilpen, dat war de Mannslüü öhre frie‘e Tiet! Andere, dee in de underste Liga Fautball speelt, het sülwest Spaß an de Speele un trainiert iesern un speelt, awer nich forr Jeld ! Forr deTaukuckers sünd dat schöne Speele, da speelt nämlich wahrhaftich "unse Jungens", dee se von Kind an kennt.

Spaß oder "Fun" willt ook hüte - wie dunne in Rom - veele Lüü alle Daa hem‘n. Wenn‘t nich so klappet, werd hüte Pilln ineschmetten. Düsse Spaß kann höllisch veel kosten, nich bloot Jeld!

Freude an sien‘n Leben bruuket jeder, dee mot hei hem‘n, süss werd hei krank. Awer dat Leben is nu mal nich bloot en Spaß! Dat is et vielleicht forr ne Fruu wie Paris Hilten, nich awer forr unsereins. Forr uns jildet de schöne plattddütsche Spruch:

"Wer Dach forr Dach siene Arbeit deit un ümmer op‘n Posten steiht, un deit dat oft un deit dat jeern, dee kann sick ook mal amüseern."

Amüseern ja, awer nich afflenken laaten un gratis taukucken in en Circus bien Dootmaken wie dunne in Rom un nich wie hüte bien Dschungelcamp in‘n Fernsehn! Forr mick is dat kein Speel !

Awer de Inschaltquoten het estimmet.

In‘n Circus in Rom warn dunnemals de Ränge in de Arena stoppenvull, kein Platz war frie.